دوستوں کی اقسام

چلیں جی آج ہم آپ کو دوستوں کی اقسام بتاتے ہیں۔

نمبر ایک:
مفت دوست
یہ دوستوں کی وہ قسم ہے جو آپ سے فضول یعنی مفت میں فری ہونے کی کوشش کرتے ہیں۔کسی تیسرے بندے کے سامنے آپ کا تعارف اپنے عزیز دوست کے طور پر کرواتے ہیں اور آپ دل میں یہ سوچ رہے ہوتے ہیں کہ جان نہ پہچان میں تیرا مہمان۔

نمبر دو:
ایویں دوست
یہ بھی مفت دوستوں جیسے ہی ہوتے ہیں بس ان میں اور مفت دوستوں میں اتنا سا فرق ہوتا ہے کہ یہ آپ سے جب بھی ملتے ہیں تو ایسے ملتے ہیں جیسے برسوں سے آپ کے دوست ہیں۔ ملتے ہی فری ہو جاتے ہیں چاہے پہلے زندگی میں ایک آدھ بار ہی ملاقات ہوئی ہو۔

نمبر تین:
ڈسپوزیبل دوست
جیسا کا نام سے ہی ظاہر ہے کہ اس قسم کے دوست کیسے ہوتے ہیں‌، تو جی یہ وہ لوگ ہیں جو آپ کے دوست صرف اس لئے بنتے ہیں‌ کہ آپ سے اپنے مطلب کا کام لیں‌اور کام ختم ہوتے ہی دوستی کو کسی ڈسپوزیبل چیز کی طرح پھینک دیں۔ ایسے بندے آج کل بہت کامیاب رہتے ہیں۔

نمبر چار:
امیر دوست
دوستوں کی قسموں میں امیر دوست کو بہت اہمیت حاصل ہے۔دوستوں کے کسی بھی گروپ میں عام طور پر ایک عدد امیر دوست لازمی ہوتا ہے۔ جیسا کہ نام سے ظاہر ہے کہ یہ دوست امیر ہوتا ہے لیکن اپنی امیری کی وجہ سے یہ اکثر باقی دوستوں کے لئے سر درد بن جاتا ہے۔ امیر دوست کو عام طور پر حکم چلانے کی عادت ہوتی ہے اور اس عادت سے مجبور ہو کر وہ اپنے دوستوں پر بھی حکم چلاتا ہے۔ یہ سمجھتا ہے کہ جو وہ کہہ رہا ہے صرف وہی ٹھیک ہے اس کے علاوہ سب غلط۔

نمبر پانچ:
بے غیرت دوست
دوستوں کی اس قسم کی بہت سی تعریفیں ہو سکتی ہیں۔ لیکن بنیادی تعریف یہی ہے کہ یہ بہت بے غیرت ہوتا ہے ۔ عزت اور غیرت سے اس کا دور دور کا بھی کوئی واسطہ نہیں ہوتا لیکن اس کا یہ مطلب نہیں کہ یہ مخلص نہیں ہوتا۔ سوچیں کہ اگر بے غیرتی کر کے اور بے عزتی کرا کے بھی اگر یہ دوستی نبھاتا ہے تو پھر اس سے بڑا تو کوئی بے غیرت ہے ہی نہیں۔

نمبر چھ:
پرانا دوست
یہ دوستوں کی ایک خاص الخاص قسم ہے۔ یہ دوست عام طور پر بچپن کا ایسا دوست ہوتا ہے جس سے باقی سارے دوست جیلس ہوتے ہیں کہ اس کی موجودگی میں تو ہماری بات کوئی سنتا ہی نہیں۔

نمبر سات:
پرائیویٹ دوست
پرائیویٹ دوست ذرا پرائیویٹ قسم کا دوست ہوتا ہے جس کا تذکرہ کسی کے سامنے نام لے کر نہیں کیا جا سکتا۔ اس کی پردہ نشینی کی وجوہات ہر بندے کے لحاظ سے مختلف ہوتی ہیں۔ اکثر لوگوں کے ہاں اس کی سب سے بڑی وجہ جنسِ مخالف ہوتی ہے۔ لیکن سب لوگوں کے کیس میں ایسا نہیں ہوتا۔ جیسا کہ ہمارا پرائیویٹ دوست ۔

نمبر آٹھ:
ڈھیٹ دوست
ڈھیٹ دوست بے غیرت دوست سے زیادہ مختلف نہیں ہوتا ۔ اس کی ڈھٹائی ہی اس کی دوستی کی سب سے بڑی دلیل ہوتی ہے۔ یہ وہ کمبل ہوتا ہے جسے آپ لاکھ چھوڑنا چاہیں پر یہ آپ کو نہیں چھوڑتا۔

نمبر نو:
ولائتی دوست
عام طور ایسے کالے انگریز جو باہر جا کر انگریزوں سے زیادہ انگریز بن جاتے ہیں ولائتی دوست کا درجہ پاتے ہیں۔ یہاں کے دوست بھی اپنی مطلب پرستی کی وجہ سے ولائتی دوست سے صرف ولائتی چیزیں مثلا جنسی دوائیاں، امپورٹڈ کپڑے، کھلونے اور تفریح طبع کا دیگر سامان فرمائشیں کر کر کے منگواتے ہیں۔

نمبر دس:
خودبخود دوست
یہ وہ دوست ہوتا ہے جس سے آپ کی دوستی فالتو میں ہی خود بخود ہو جاتی ہے۔ مثلا آپ کسی جگہ کام کرتے ہیں اور وہاں پر آنے والا کوئی کسٹمر آپ سے اتنا فری ہو جاتا ہے کہ کچھ عرصے بعد آپ کو پتا چلتا ہے کہ یہ تو دوست بن گیا ہے۔

نمبر گیارہ:
مجبورا دوست
یہ دوستوں کی وہ قسم ہے جس سے آپ کو اکثر و بیشتر کام پڑتے رہتے ہیں ۔ کیونکہ آپ بھی تو مفت، ایویں، ڈسپوز ایبل، بے غیرت یا ڈھیٹ دوست ہو سکتے ہیں۔

نہیں؟؟؟

بلو بلا